Беларуская дыктоўка ў Празе: пісалі самы знакаміты верш Геніюш

Сёлета Міжнародны дзень роднай мовы прыпаў якраз на суботу, 21 лютага. У Празе традыцыйная дыктоўка прайшла ў памяшканні Беларускай клубоўні. Арганізатары выбралі для дыктоўкі знакаміты верш Ларысы Геніюш Працягласць.

 

Паводле Алены Ціхановіч, якая тэкст чытала, гэтыя радкі абавязкова стануць такімі ж хрэстаматыйнымі як Мой родны кут. Аўтарцы ў гэтым тэксце ўдалося ўвасобіць як рысы беларускага характару, так і самыя яркія адметнасці мовы. Тэкст надзвычай мілагучны з-за мноства мяккіх спалучэнняў, і гэта было добрае практыкаванне на правапіс мяккага знака. Большасць удзельнікаў пісалі сучасным варыянтам правапісу, але адзін прынцыпова трымаўся тарашкевіцы. Пераможцам дыктоўкі  нечакана стаў госць з Варшавы, бард і музыка Андрэй Лугін, які прыехаў суправадзіць імпрэзу сваім канцэртам. Журы не знайшло ў яго тэксце ніводнай памылкі. Сп.Андрэй на пытанні пра яго моўную падрыхтоўку адказаў, што ў яго жонка філолаг.

Усе ўдзельнікі дыктоўкі атрымалі Беларускую падручку, спецыяльна выдадзеную ў Празе. На двухбаковай каляровай картцы ў сціслай форме пададзеныя асноўныя асаблівасці беларускага маўлення, часціны мовы, склоны, назвы месяцаў і тыдня, прыказкі і языкаломкі, верш. Тут жа знойдзем ілюстраваны алфавіт і адметную беларускую выцінанку. Выданне можна будзе замовіць у суполцы Скарына (skaryna@email.cz).

Беларускую дыктоўку гэтым разам праводзіла суполка Скарына пры падтрымцы Беларускага інстытута ў Празе і суполкі Пагоня. Беларусы Брна пісалі сваю дыктоўку 22 лютага.